झापा, पाँचौं झापा गोल्डकपको उपाधि विभागीय टोली त्रिभुवन आर्मी फुटबल क्लबले उचालेको छ ।
बिर्तामोडस्थित डोमालाल राजवंशी रंगशालामा सोमबारको फाइनमा घरेलु टोली झापा-११ लाई २-१ ले पराजित गर्दै आर्मीले उपाधि रक्षा गरेको हो । ।
खेलको १८ औं मिनेटमा टेकबहादुर बुढाथोकीको गोलबाट आर्मीले अग्रता लिएको थियो । २१ औं मिनेटमा जर्ज प्रिन्स कार्कीले आर्मीको अग्रता दोब्बर बनाए ।
२४ मिनेटमा विमल घर्ती मगरले झापालाई २-१ को अवस्थामा ल्याए । त्यसपछि थप गोल हुन नसक्दा आर्मी विजेता बन्यो ।
आर्मीले चौथोपटक झापा गोल्डकपको उपाधि उचालेको हो । यसअघि उसले पहिलो, तेस्रो र चौथो संस्करणमा झापालाई नै हराउँदै उपाधि जितेको थियो ।
झापाले यसअघिका चारवटै संस्करणमा पनि उपविजेतामै चित्त बुझाएको थियो। ऊ दोस्रो संस्करणको फाइनलमा मनाङ मर्स्याङ्दी क्लबसँग पराजित भएको थियो।
सेमिफाइनलमा झापाले संकटा तथा आर्मीले सेमिफाइनलमा सातदोबाटोलाई हराएको थियो । विजेता आर्मीले उपाधिसहित १२ लाख ५५ हजार प्राप्त गर्दा उपविजेता झापाले ६ लाख ५ हजार प्राप्त गर्यो ।