काठमाडौं– कानून व्यवसायीहरुको छाता संगठन नेपाल बार एशोसिएशनको केन्द्रीय कार्य समितिको नयाँ नेतृत्व चयनका लागि मतदान सम्पन्न भएको छ। काठमाडौंसहित देशभरका ३५ वटा स्थानमा मतदान भएको हो।
मतदान आज भए पनि मतगणना भने सोमबारमात्रै सुरु हुने भएको छ। देशभरबाट मतपेटिका आइपुग्न समय लाग्ने भएकोले सोमबारबाट मात्र गणना सुरु हुने निर्वाचन कार्यालयले जनाएको छ।
प्रमुख निर्वाचन अधिकृत वरिष्ठ अधिवक्ता उषा मल्ल पाठकका अनुसार देशभरका मतपेटिका काठमाडौंमा ल्याएर मतगणना सुरु हुने हुनाले परिणाम आउन करिब ३ दिन लाग्ने अनुमान गरिएको छ।
बारमा अध्यक्षसहित ११ जना पदाधिकारी र सदस्यसहित २५ जनाको कार्यसमिति चयन हुनेछ। नयाँ कार्य समितिको नेतृत्वको लागि प्रगतिशील तथा पेशागत कानून व्यवसायी समूह र पेशागत कानुन व्यवसायी समूह र बृहत लोकतान्त्रिक प्रगतिशील समावेशी तथा पेशागत कानून व्यवसायी समूहबीच प्रतिस्पर्धा हुनेछ।
प्रगतिशील तथा पेशागत कानून व्यवसायी समूहको नेतृत्वमा वरिष्ठ अधिवक्ता विष्णुमणि अधिकारी र बृहत लोकतान्त्रिक प्रगतिशील समावेशी तथा पेशागत कानून व्यवसायी समूहको नेतृत्व गोपालकृष्ण घिमिरेले गरेका छन्।
