वीरगञ्ज, जसपाका नेता एवं पर्साको वीरगञ्ज नगरपालिकाका मेयर विजय सरावगी नेकपा एमालेमा प्रवेश गरेका छन् ।
वीरगञ्जमा शनिबार आयोजित एक कार्यक्रममा एमालेका अध्यक्ष केपी शर्मा ओलीले मेयर सरावगीलाई एमालेमा प्रवेश गराएका हुन् । ओलीले सरावगीलाई दोसल्ला ओढाएर पार्टीमा स्वागत गरेका थिए ।
एमालेमा प्रवेश गरेका मेयर सरावगीले जसपाले जातिवादको राजनीति गरेको आरोप लगाएका छन् । उनले पार्टीले राम्रा मान्छेलाई टिकाएर राख्न नसकेको समेत बताए ।
‘जसपा छोड्ने कारणहरू छन् । त्यो सबैलाई थाहा छ, आम जनतालाई थाहा छ, एउटा राम्रो मान्छेलाई पार्टीले टिकाएर राख्न सकेन’ उनले जसपा छोड्नुको कारण खुलाउँदै भने अहिले पनि जातिवादको राजनीति भइरहेको छ ।
जातिवादको राजनीति गरेर राष्ट्रिय पार्टी हुन सकिँदैन । राष्ट्रिय पार्टी भनेको हाम्रो एमाले पार्टी नै हुन सक्छ ।’
एमालेमा प्रवेश गर्नु अगाडि उनी कांग्रेसमा प्रवेश गर्ने हल्ला थियो । उनले पूर्वमन्त्री एवं व्यवसायी मोती दुगडले अध्यक्ष ओलीसँग भेट गराएपछि एमालेमा प्रवेश गरेको खुलाए ।
उनले आफू एमाले अध्यक्ष ओलीबाट सुरुदेखि नै प्रभावित भएको भन्दै प्रशंसासमेत गरे । २०७४ सालको स्थानीय तहको निर्वाचनमा सरावगी तात्कालीन संघीय समाजवादी फोरमबाट मेयरमा निर्वाचित भएका थिए ।
