एजेन्सी, कोभिड संक्रमण बढेपछि चीनको १ करोड ७० लाख जनसंख्या भएको शेनझेन शहरमा लकडाउन घोषणा गरिएको छ ।
शेनझेनको दक्षिणी टेक हबले सम्पूर्ण बासिन्दालाई २० मार्चसम्म घरभित्रै बस्न भनेको छ । सो अवधिसम्म सार्वजनिक सवारी साधनहरू पनि नचल्ने स्थानीय सरकारले जारी गरेको सूचनामा उल्लेख छ ।
कोभिडको नयाँ भेरियन्ट ओमिक्रोन निर्मूल गर्न चुनौती सामना गरिरहेका बेला सरकारले पछिल्लो प्रतिबन्ध लगाएको हो । पछिल्लो समयमा चीनमा कोभिड संक्रमण दर बढ्दो छ ।
‘यदि रोकथाम र नियन्त्रणलाई समयमै र निर्णायक रूपमा सशक्त बनाइएन भने यो सजिलै समुदायस्तरमा फैलिन सक्छ’, शेनजेनका स्वास्थ्य अधिकारी लिन ह्यान्चेङले भने ।
चीनभर संक्रमणमा वृद्धिले अधिकारीहरूलाई सांघाइमा विद्यालय र उत्तरपूर्वी शहरहरू बन्द गर्न बाध्य बनाएको छ । चीनमा पहिलोपटक २०१९ को अन्त्यतिर कोरोना भाइरस देखिएको थियो ।
त्यसयता चीनले शून्य–कोभिड नीति अंगिकार गर्दै आएको छ । चीनले संक्रमण बढेपछि यही साता उत्तरपूर्वी शहर चाङ्गचुनमा पनि लकडाउन घोषणा गरेको थियो ।
वर्ल्डोमिटर्सका अनुसार गत २४ घण्टामा चीनमा १ हजार ९३८ जना नयाँ संक्रमित थपिएका छन् । त्यहाँ महिनौँपछि यति ठूलो संख्यामा संक्रमित थपिएका हुन् ।
हालसम्म चीनमा १ लाख १६ हजार ९०२ जनामा कोरोना पुष्टि भएको छ । जसमध्ये १ लाख ३ हजार संक्रमणमुक्त हुँदा ४ हजार ६३६ जनाको मृत्यु भएको छ ।
