काठमाडौं, सत्तारुढ दल नेपाली काँग्रेसको जारी केन्द्रीय कार्य समितिको बैठकमा स्थानीय तहको निर्वाचन र गठबन्धनका दलहरुबीचको चुनावी तालमेलका सन्दर्भमा सैद्धान्तिक निर्णय गर्नुपर्ने सुझाव प्राप्त भएको छ ।

‘घर–घर जाऔं, काँग्रेस जिताऔं भन्ने अभियान सञ्चालन गर्दै आएको काँग्रेसको बैठकमा जिल्ला, प्रदेश र स्थानीय तहको परिस्थितिबारे केन्द्रीय सदस्यहरुले आ–आफ्नो धारणा राख्नुभएको पार्टी प्रवक्ता डा. प्रकाशशरण महतले बताए ।

‘कुन ठाउँमा कस्तो वस्तुस्थिति छ, त्यसका आधारमा कहाँ तालमेल गर्ने र कहाँ नगर्ने त्यसको निर्कियौंल गर्ने र समग्रमा पार्टीलाई कसरी मजबुत बनाउने भन्ने विषयमा समग्ररुपमा समीक्षा एवम् मूल्याङ्कन भयो, उनले बताए ।

अधिकांश मत तालमेल, समझदारी र गठबन्धन गरेर जाने भन्ने रहेको र कतिपय मत गठबन्धन नगरी एक्लै पार्टीलाई परीक्षण गर्नुपर्छ भन्ने पनि रहेको उनको भना छ ।

संविधानको मूल्य र मान्यता कमजोर बनाउने विशिष्ट परिस्थितीमा गठबन्धनको निर्माण भएकोले यसलाई अगाडि बढाउदा नै जित्ने स्थिति बन्ने उनले बताए ।

काँग्रेस केन्द्रीय कार्य समितिको भोलि पुनः मंगलबार दिउँसो ३ बजे बस्ने बैठकले यसबारे निर्णय गर्ने तयारी छ ।